Espazo Solidario é un equipamento básico e referente para a xestión e o desenvolvemento de programas referidos á solidariedade e ao voluntariado que pertence á Concellaría de Mocidade, Solidariedade e Normalización Lingüística. Dirixido ás entidades de acción voluntaria, de cooperación para o desenvolvemento, de solidariedade e xustiza internacional e de toda a cidadanía con interese no eido da solidariedade e do voluntariado, pretende ser un espazo físico de encontro e información e de apoio ás entidades , potenciando e reforzando o movemento social da cidade.
As instalacións
Espazo Solidario é un equipamento que conta cunha sala de usos múltiples de cáseque 80 metros cadrados para poder desenvolver todo tipo de actividades formativas e expositivas e cun despacho totalmente equipado que poderá ser empregado como sede social polas entidades que reunindo os requisitos marcados, así o soliciten.
Espazo Solidario crease para ser un referente básico na xestión e desenvolvemento de programas relacionados coa solidariedade e co voluntariado, pondo a disposición das entidades espazos e servizos para o desenvolmento da súa actividade interna e externa.
Espazo Solidario é sobre todo un espazo físico de encontro e información, de sensibilización e de promoción, de formación e de apoio ás entidades e á cidadanía.
Os obxectivos do Espazo Solidario
- Promover a sensibilización sobre problemas sociais e necesidades dos distintos colectivos destinatarios das entidades de acción voluntaria, así como o coñecemento da realidade dos países empobrecidos.
- Fomentar a participación voluntaria da cidadanía a través das entidades de acción voluntaria e entidades de cooperación para o desenvolvemento e de solidariedade e xustiza internacional.
- Promover os valores da solidariedade.
- Informar e asesorar ás persoas interesadas no voluntariado.
- Apoiar a xestión e actividades das entidades de acción voluntaria e das entidades de cooperación ao desenvolvemento e de solidariedade e xustiza internacional, pondo ao seu dispor espazos e recursos.
- Impulsar e favorecendo o encontró, a relación e o intercambio entre entidades.
- Visibilizar o labor das entidades e persoas voluntarias que tecen de solidariedade a nosa cidade.
